Ақын Фариза Оңғарсынованың 80 жылдығына арналған «Жанымда арман, мақсат көп...» атты әдеби кеші
08.11.2019 ж. Саран қ. ОҚК коворкинг орталығында СГТК студенттері үшін жүректерді жан жылуымен ерітіп, поэзия әлемінің биік шыңдарын өз еркіне бағындырып, қиялға қанат сермеген Қазақстанның халық жазушысы, Мемлекеттік сыйлықтың лауреаты, қоғам қайраткері, ақын Фариза Оңғарсынованың 80 жылдығына арналған «Жанымда арман, мақсат көп...» атты әдеби кеш өтті. Іс-шара ақынның өмірі мен шығармашылығын таныстыратын бейнефильмнен басталды.
Фариза өлеңдері оқырмандардың жан азығына айналған қымбат дүние. Фариза жырлары кейінгі ұрпақты ар-намысқа, ерлікке, нәзіктікке, ананы, әкені, туған жер, адамзатты сүюге бастап апаратын ақ жол іспетті."Жас толқын" әдеби клубының мүшелері Фаризаның "Әкеме", "Мен осы не істесем екен бүгінгі", "Сағыныштың, айтшы осы, төзім бе емі", "Кетпейсің ұшып сен неге", "Жанымда жүрші", "Жетімнің монологы" өлеңдерінен үзінді оқып, оның шығармашылығы арқылы поэзияның сиқырлы әлеміне саяхаттады.
Әдеби кешті А.Құнанбаев атындағы СГТК студенті Сайлау Әлия, Асылбек Енсеповтың "Әке толғауы" күйімен әсерлей түсті. Шара барысында қатысушылар Фаризаның өмірі мен шығармашылығы жайлы сұрақтарға белсенді жауап беріп, автордың шығармалары туралы өз пікірлерін білдірді.
Іс-шараны Абай Құнанбаев атындағы СГТК студенті, Роза Әлқожаның "Фариза" әнімен аяқтады. Кеш соңында қатысушылар алғыс хаттармен марапатталды.
Келулердің саны: 2186
